Alciati Emblematum liber
Emblema CLXXXI
Eloquentia fortitudine praestantior
Arcum laeva tenet, rigidam fert dextera clavam,
Contegit et Nemees corpora nuda leo.
Herculis haec igitur facies? Non convenit illud
Quod vetus, et senio tempora cana gerit.
Quid quod lingua illi levibus traiecta catenis,
Queis fissa facile is allicit aure viros?
Anne quod Alciden lingua, non robore Galli
Praestantem populis iura dedisse ferunt?
Cedunt arma togae, et quamvis durissima corda
Eloquio pollens ad sua vota trahit.