Alciati Emblematum liber
Emblema CXLV
In Senatum boni Principis
Effigies manibus truncae ante altaria divum
Hic resident, quarum lumine capta prior.
Signa potestatis summae, sanctique Senatus
Thebanis fuerant ista reperta viris.
Cur resident? Quia mente graves decet esse quieta
Iuridicos, animo nec variare levi.
Cur sine sunt manibus? Capiant ne xenia, nec se
Polliticis flecti muneribusve sinant.
Caecus at est Princeps; quod solis auribus, absque
Affectu, constans iussa Senatus agit.